Pé Daalemmer & Rooie Rinus Zundagoavend Blues Lyrics

Ik stond lest te liften veur 't station van Appingedam
Ik was bie mien moeke op verziede west
En was nou weer terog op weg noar mien koamer in stad
Leste traain was net tien menuten vot dus ik an 't liften ja
En doar ston ik in 't duuster langs rieksweg 41
En 't was nog klotenweer ook
Doar heurde ik 'n auto an kommen broezen moar hai ree deur
En ging boetendes nog richting Delfziel ook

De papieren puut mit poepetonen dai ik van mien moeke
Oet de vraizer mitkregen had
Was al hailendaal deurwaikt deur dai rottege regen
Dai mie nou ook al bie nekvelle laangs begon te lopen
In de verte zag ik 'n poar koplampen dichterbie kommen
Dus ik begon as 'n gek mit mien aarms te zwoaien
Woardeur puut openscheurde en poepetonen op weg sodemieterden
Tjongejongejongejongejonge, wat had ik 'n mazzel
Want ik kon mitrieden tot Wirdumerdraai

Moar onderwegens bie Tjamsweer
Kroop mie de onderboksem tussen de bilnoad
En ik had zo'n strakke spiekerboksem an
Dat ik 'n der ook nait zomoar even oet kon pulken
Gelukkeg bie 't bushokje van Wirdumerdraai
Kon ik boudel weer op stee leggen
En anderhaalf uur loater kreeg ik alweer een lift
Richting stad
't Was nait in 'n Porsche, 'n Bentley of 'n Jaguar
Moar in zo'n dikke bestelauto van de Spar

Net noa sloetenstied van cafe's wer ik oetzet
Bie club taboe op Botterdaip
Moar ik haar toch zo'n dorst kregen
Van al dai zolte pinda's dai ik van dai chaffeur kregen haar
Dus ik denk ik goa moar es bie Rinus kieken
Ik belde bie 'm an
Moar hai dee mie nait open