M'r schrevv et Johr 1627. All daachten se, die Zick der Hexenverfolgung wör vorbei,
als et och en Kölle widder lossjing.
En janz Europa leete hundertdausende vun Minsche om Scheiterhaufe ihr Levve.
Stellvertretend für se all steiht he die Kölner Postmeisterin Katharina Henot.

Em hellije Kölle vür 400 Johr
läävte et Katharina Henot,
en jestandne staatse Frau, huh aanjesinn
stund se em Lääve ihre Mann.
Se wor stolz un joddesfürchtich
un dät jän helfe, wat hät et ihr jebraat,
noh Verleumdung wäjen Hexerei wood se anjeklaach.

Bes op et Bloot jefoltert han se dich
se nohmen sich dat Rääch.
Zerbroche han se dinge Liev
doch ding Siel, die han se nit jekrääch.
Lur zom letztemol noch zom Himmel rop,
küss em Lääve nit mih heim.
Op Melote wor di Golgatha
besiejelt am Blaue Stein.

Un se hatt doch nur ei Lääve, ei Lääve ze jevve.

Salve Katharina in memoriam
du bes für uns die Königin
Salve, Salve Regina Katharina
Do läävs en unserm Hätze dren.

Un de Kirch, unfählbar, domols so wie hück
kannt kein Minschlichkeit, kei Erbarmen,
zesamme met d'r Obrigkeit braat se vill Leid
anstatt Jeräächtigkeit.
Wenn Glaube zor Verblendung weed,
statt Liebe nur Haß un Angs rejiert,
dann storv Jesus janz ömsöns am Krütz,
han de Minsche jemols drus jeliert ?

Un hä hatt doch nur si Lääve, si Lääve ze jevve.

Salve Katharina in memoriam
Du bes für uns die Königin
Salve, salve Regina Katharina
Do läävs en unserm Hätze dren.
Salve Katharina in memoriam
du bes für uns die Königin,
salve, salve, Regina Katharina
Du wees uns unverjeßlich sin.

See also:
JustSomeLyrics
73
73.17
GREATEST LOVE OF ALL Hero Lyrics
Bob Marley Looking in Your Big Brown Eye Lyrics