Zidor Le vers solitaire Lyrics

Le vers solitaire

Le Bounhomme Joséï étét in bounhomme, queumment qu'i dirèïs, qu' en trouvét bèï dans son lit, in bounhomme qui fèsét bé au moins-ye cent... cent vingt kilos. Pis bounnes gens, la bounne femme, Mélanie, a l' voyèït tos lés jours dépéri... dépéri. Le mangeait poèt', do bout dos balots. Ine belle jornaïe, a li dit : « Bé mon paure bounhomme, bé 't-o qui t' prend ? As-tu bé vu ? 'Garde dinc itchi qu' te balles dans tés canucins !
- Ah ! voui, que l' dit, tchu poét tchu qu'i aï, més tcheu va poét piang'ment de tcho moument.
- Alors, bounnes gens, qu'a dit, i allans d'mander-t-ine cansulte.
- Més nin, que l' dit, te verras, oh ! qu' tchu pass'ra baï. La s'maine passéïe qu'i avans-t-été-t-à la foère à Lucin, i étais avec... le... min copain, itchi, Machin, pis tot d'in coup, i ai senti queuque chose qui m' descendait l' ling d' la cuisse, que l' dit, j'é tiraï bé vite. Le m'a dit : 't-o qu'ést tchu qu' t'as ? In galin d' cal'cin itchi ? Mmh ! Ah ! dame, que l' dit, i sés poét à mes a__iettes. »
Alors v'là la bounne femme qui dit : « Ol a la voésine, itchi, qui m'a prétaï tchés... tchés affaires qu'on... qu'on musse peur prendre la pétanture. Dounne dinc, qu'i allins-t-éssayaï : i verrins tot d' suite.
- Ah ! dame, que l' disit, mets-mou pas tchu dans moï, que l' dit. Heu, o va poèt', pis heu, i crés bé qu'i é més d' cinquante, que l' dit. Itchi, tés, i pouvans pas nous touchéï d' la manière qu'i sés chaod. »

Alors, ine belle jornaïe, v'là la bounne femme qui dit d' même : « 'Tends-tu ? I allins aller voèr la cousine, itchi, la Dormuse : a nous sogn'ra baï, lé, alle a l'habitude. » La v'là qui prend le canucin au bounhomme pis qui s'en va voèr la Dormuse.

Quand alle a-t-arrivaï chez la Dormuse, v'là-t-o pas que... Ol avét do minde, do minde, l' saviant poét avour lés mette. Alle étét itchi, qu'alle attendét : « Alors, qu'a li dit, comment qu'o va d'pis qu'i t'avais vue ?
- Oh ! bé qu'a... dame, qu'a dit, moaï o va à pu près, més ol ést tcho pauve bounhomme, tcho pauve José, tchu va pas. L'ést... l'ést rin-ye de li-maème. »
Alors a dounne le canucin au bounhomme. V'là la bounne femme qui c'mmence à prende sin pougnet, pis qui dit : « Ah ! bé, dame, qu'a dit, l'ést poét en bounne posture, ést moé qui t'o dis. Ah ! bé, t' séïs, huit jours d' plus, pis t'avés pus d' bounhomme.
- Ah ! dis pas tchu, qu'a dit, i ai encore besoin d' li queuque temps. Tchu, tch'ést poét la rente, qu'a dit la bounne femme. »

Alors, lés v'là qui rentent à la mésin. « Et pis, qu'a dit, te voéïs, dans huit jours o s'ra la lune. Te li dounn'ras bé d' la tisane, bé c'mme o faot, d' la sangu'nite, pis te verras : tch'ést ine grousse bêïte que l'a dans l' vente, in gros achét qui fét bé au moins trois quate mètes. Pis te verras, l' sortira. Més te séïs, quant' le sortira, pis qu' le sentira tchette bestiole, faut qu'o fache bé nèr. Et pis surtout, quant' le c'mmenc'ra à o sentir, faut qu' le l'aide, de maême, à o tirer tot douc'ment. »

'Lors huit jours après, v'là la bounne femme, au sèr, qui rente ine pieine beuroette de jaras, heu, et pis qu'a dit : « Tcho bounhomme, d' la force que l'aïst, hè, i allins faire la tisane dans la lessiveuse. De même, i s'rans bé sûrs d'en avoèr a__aïz, qu'a dit d' même. » Fout la lessivuse dans la ch'minaïe, et pis, lés v'là tot installaïs. Frume les croiséïes peur qu'o fasse nèr. Alors a fout ine grande pieine soupiène de tisane au bounhomme. Le tis... le bounhomme, le buvét tchu do bout do balots. « Ah ! dame, qu'a dit, téïs si tch'étét do vin roge, o coul'rét bé pus vite, tès. »
L' bounhomme coulét tchu, tot douc'ment. « Te sens rin-ye, qu'a li dit ?
- Nin, nin, sens rin, sens rin, sens rin.
- Prends-en dinc ine duxième ! »
Duxième soupiéraïe. Hé là là ! L'avét in vente comme in ché naï ! Hu ! Tot d'in coup, que l' li dit d' même : « Hé, i crés bé, i... i... i... i...crés bé qu'o v'là. I... attentiin ! » La bounne femme qu' étét itchi sus l' f... coin do fouer d' la ch'minaïe, alle étét en train d' brocher. Pensez dinc qu'a brochét d'pis l'âge de... tote tote tote tote 't__e, alle allét garder lés ouailles. Même qu'o fèsét nèr, a pouvét brocher quand mêïme.
« Hein ! bé t' sés c' qu'alle a dit, hein-ye ? O faut qu' te l'aides à sortir, tot douc'ment, tot douc'ment, tot douc'ment. » V'là l' bounhomme qui tire tot douc'me-ent, tot douc'me-ent, tot douc'me-ent. « Oh ! bé dame, que l' dit, oh ! tchu m' fét bé do baï, que l' dit ! » Fèsét bé in quart d'hure que l' tiréït, pis qu'o v'nét tot l' te-emps. « Bé ! dame, qu'a dit la bounne femme, i vas teurjous bé voér la tête qu'alle a à tcho bout tchelle affaire.
- Ah ! Fais pas tchu, que l' dit : t' sés bé qu'alle a dit si l'... jamais l' copét, l' poussét dux foés pus ling. » Pis tot d'in coup, l' bounhomme qui dit : « Oh ! bé dame, ma pauve Mélanie, i crés bé qu'i é dos fréchurs, i é in p't__ fréd au vente, i é ine fréchur qui m' monte.
- Ah ! la bounne femme qui dit : 'Tends-tu ? I vas pécher la lampe pigin, itchi, tchu... tchu équiaire pas bérède pis i vas bé voèr c' qu'ol en èïst, moé, d' tchelle affaère. » Alle allume la lampe pigin : heu, beurnancio d'azirabe bounhomme ! Pensez-vous baï qu' l'avét détricoté tote sa fianelle !