Pape jon je gradi brode bi je meštar o' zanata,
na sve bande ka' se ode nigdir takvog kalafata.
Bi je meštar zlatne ruke ma najlipje ča je jema,
nisu brodi nasrid luke vengo ćer, krasota je'na.

Njene oči pune vire caklile se ka o' zlata,
jubila me priko mire ćer o' stareg kalafata.
Ču san srce di jon kuca poput fineg, skupeg sata;
(Jubila me blizu guca ćer o' stareg kalafata.)

Za vinčanje njen je pape najboji nan brod porinu,
letile su u vis kape ma nesrića sve prikinu.
Puknula je cima broda ošinula je nevistu,
ka' kad satu pukne korda osta ležat tu na mistu.

Njene oči pune vire izlile su sjaj svog zlata,
jubila me priko mire ćer o' stareg kalafata.
Srce više joj ne kuca, moje tuče poput mlata;
(Kad se sitin blizu guca ćeri stareg kalafata.)

See also:
JustSomeLyrics
106
106.6
Yoshitaka Kitanami Dopo Il Sogno Lyrics
Sheer The Girl That Lost Her Mind Pt. 1 Lyrics