Амь оруулсан, миний багын зураг мэт
Алив хүү минь, ижий ир дээ
Алдар хүнд, үс зүс минь гундахын цагт ч
Амьтныг дагаж урвахгүй ганцхан эр хүн чи минь дээ

Өлгийн гурван бүсийг нь ижий нь чангалж бүүвэйллээ
Өсгөлүүн эр болоорой
Өнө хожмын өдөр олмыг нь чангалж үднэ
Хол яваарай, миний хүү

Ганцхан заяах насыг нь ахиухан өг дөө, Бурхан минь,
Галгиж гулгиж яваг, дураарай байг, үр минь
Галтайхан хархүү, миний хүү энэ орчлонг
Гайхуулсхийгээд туулаг ээ

Эрвэлзсэн хүлэг чинь жороотойхон байг,
Эхнэрийн сайхан хүүтэй минь ханилаг,
Эдийн дээд-торгоор биеэ хулдаж
Эрийн сайн нь хүүтэй минь нөхөрлөг ээ

Эвшээсэн нумын хатан сум холдоо очиж тусна
Ээжийнх нь шүлгэн сүнс хэзээд хань болно
Хэрэг болгож чамд би ганцхан юм захина
Хэлгий нялх чи минь хожмоо ухаарнаа

Эх орон гэдэг, заримдаа давчдаж
Эгэл түмэн минь мунхарсан мэт санагддаг
Өдөт хөнгөн шувууны даль мэт
Өнчин зүрх алсын алсыг мөрөөддөг өө
Явж л болохгүй шүү тэгэхэд, энэ жаахан Монголоосоо
Яагаад гэж тэр үед өөрөөсөө чи асууна
Ядмагхан ч гэсэн энэ л эх орон
Яруу найрагч ээжийг чинь төрүүлсэн юм шүү.

See also:
JustSomeLyrics
125
125.93
gwen stef The Sweet Escape Lyrics
ウソップ (山口 勝平) Sogeking Theme Lyrics